Concurs leterar SCRIBO 2026: al é gnü proclamé i davagnadus

La cuinta ediziun dl concurs leterar ladin á albü n bel suzes. Sö por trënta scriturs y scrituries ladines á tut pert.

URTIJËI (USP). La cuinta ediziun dl concurs leterar ladin, metüda a jí en chësc iade dal Istitut Ladin "Micurá de Rü" en colaboraziun cun le Departimënt Intendënza y Cultura Ladina, á albü n bel suzes. Sö por trënta scriturs y scrituries ladines á tut pert.

I tesć dl concurs SCRIBO 2026 che é gnüs premiá, gnará publicá te n liber, adöm cun d’atres cunties menades ite por le concurs y chirides fora dala Comisciun por so valur leterar. Aladô dl regolamënt dl concurs podôl gní dé jö contribuc cina 8000 batüdes; chisc ê partis sö danter les döes categories "SCRIBO" y "SCRIBO Junior".

Tla categoria "SCRIBO" á l’auturia conesciüda Rut Bernardi davagné le pröm pest cun l’opera "L bel cramer". La cuntia dl’Auturia pó gní odüda sciöche na introduziun de n roman storich ambienté tla Engiadina, che mostra sö na gran abilité d’espresciun y n lessich rich, cura stilistica y na recostruziun avisa dl contest storich. La iuria á alzé fora la solidité dla cuntia cörta y la capazité dl’auturia da lié adöm prezijiun documentara y sensibilité leterara. Le secundo pest ti é gnü dé a Elena Frenademetz por le test dal titul "Eroines", na interpretaziun moderna dles liëndes ladines reinterpretades cun le lingaz atual. Tl test fej l’auturia n confrunt danter les figöres feminines dles liëndes y les ëres d'aldedaincö.

Por la seziun "SCRIBO Junior" ti á la iuria dé le pröm pest al test "Agnol" de Nicoletta Riz, che pita na odlada malinconica sön le passé y alza fora l’autentizité di protagonisć. Tl medemo momënt cunta le test dla vita da vigni de di personaji, segnada da na realté val’ iade crödia. Le secundo pest ti é gnü surandé a Matthias Barani y a sü compagns de classa por l’opera "Frecuenza murtela". Ara se trata de na picia cuntia tl stil thriller, scrita tla forma de n diare. La iuria á aprijé le ritm dinamich y la tenjiun narativa.

La iuria dla ediziun 2026 ê metüda adöm dal dirtetur de scora y scritur Ivan Senoner sciöche presidënt y dai mëmbri Nadia Chiocchetti, Werner Pescosta, Ingrid Runggaldier y Carlo Suani, che á valuté les operes menades ite sön la basa dla cualité linguistica, dl’originalité, dla strotöra narativa y dl contribut ala leteratöra ladina contemporana.