Di dla Cultura Ladina: "Da na generazion al'autra"

La rujeneda ladina, pona de se cruzië de dé inant la tradizion y oradechël plu premiazions ie i elemënc zentrei dl "Di dla Cultura Ladina" de n sada passeda a Urtijëi.

URTIJËI (USP). N di dut tl sëni dla rujeneda ladina, dl lecort y dla criatività: l Di dla Cultura Ladina ie stat ai 19 de setëmber, cun l moto "Da na generazion al'autra", fajan unì adalerch a Urtijëi plu generazions. Na mëisa turonda n con' dl daunì dla rujeneda ladina, dla leteratura, dl‘ert, dla mujiga, dla performances y de workshops nteratifs à caraterisà l di, metan tl zënter l mesun y la maniera de mantenì y dé inant la rujeneda, l savëi y la tradizions.

L danmesdì fova dedicà al daunì dla rujeneda ladina. Profesciunisć y reprejentantes/reprejentanc dl mond culturel à rujenà dla pruspetives dla rujeneda y dla ncëria dla generazions jëunes per coche les possa dé inant la rujeneda y cialé de si svilup. La tematica dl passaje danter la generazions ie nce unida tëuta su tres la tradizion culinaria, dl cujiné. Te n workshop à i jëuni y la jëunes mparà coche n fej bales: na ucajion per se giamië ora y per dé inant savëi y cumpetënzes.

Domesdì fòvel sun l program leteratura, ert, mujiga, reprejentazions, workshops y ativiteies nteratives y che reverda jënt de duta la generazions. Danter i mumënc de majera mpurtnza iel stat plu uneranzes, coche chëla dl Merit Ladin al prim ntendënt de scola ladin Franz Vittur, che ie mort chëst ann de juni dl 2026. Si lecurdanza y si mpëni per la scola y la cultura ladina ie unii recunesciui te na laudatio de Carlo Suani, che à cuntà y mustrà su si streda de vita y dut chël che l à fat per la causa ladina y nia mé.

Sëuraprò ti iel unì sëurandat l Ert X Merit Ladin al'artista Christine Runggaldier, che à venciù l cuncors cun si lëur dal titul "Deventé". Ntan l domesdì iel nce unì premià chiche à venciù pra i cuncorsc letereres Scribo y Scribo Junior. I cuncorsc ie dedichei ala criatività y ala criazion leterera tla rujeneda ladina y ala prumuzion dl scrì danter la generazions y sëurora.

Inant iel nce unì nunzià la parola ladina dl ann, che ie unida crissa ora dai partezipanc y dala partezipantes danter duta la "paroles ladines dl’ena" prejentedes ntan l ann. La parola crissa ora ie "deberieda".

"L 'Di dla Cultura Ladina' à mo n iede desmustrà tan viva che la cultura ladina ie y tant che la possa purté adum persones de generazions desferëntes. Dal se dé ju cun l daunì dla rujeneda nchin ala trasmiscion de savëi y de tradizions à l di metù adum lecurdanza, prejënt y daunì te n dialogh reziproch. Chësc ie dantaldut stat mesun tres la gran partezipazion dla lies cultureles ladines, che rengrazie per si mpëni de valuta," sotrissea l assessëur per la cultura ladina Daniel Alfreider.

"Do n tel di via iel l lëur de truepa jënt. Ulësse rengrazië dantaldut l team de urganisazion per si mpëni tl njenië ca y mëter a jì la scumenciadiva, coche nce nosc partner plu mpurtanc de chësta edizion: l Istitut Ladin Micurá da Rü, la Union Generela di Ladins dla Dolomites, l Circolo- Lia Mostra d'Ert y l Museum Ladin Ciastel de Tor, ma nce duta la istituzions, la truepa lies dla valedes ladines y duc chëi y chëles che à judà pea a fé garaté l di. Uniun y uniuna à dat si cuntribut, purtan pro a na manifestazion plëina de ancuntedes y de mumënc deberieda," à spiegà l diretëur dla Direzion dla Furmazion y Cultura Ladina, André Comploi. Ntan l Di dla Cultura Ladina iel unit a lum na cultura ladina viva y che se svilupea for inò, che mantën si lecurdanza y tl medemo mumënt ti cëla al daunì.