Europeada: ince cater scuadres de Südtirol fej indô para

Deperpo che le Campionat europeich dl jüch dal palé di ëi vá inant bele da chinesc dis, se deura indoman le Campionat europeich por les mendranzes linguistiches.

Cater scuadres de nosta provinzia da Balsan, chëra di ëi plü chëra dles ëres dl grup linguistich todësch, y chëra di ëi plü chëra dles ëres dl grup linguistich ladin tol pert ala Europeada 2024.

L’Europeada é le Campionat europeich dl jüch dal palé por les mendranzes linguistiches organisé dala FUEN, l’Uniun Federala dles Nazionalités Europeiches, en colaboraziun cun la mendranza che ospitëia la manifestaziun.

L’ediziun da chësc ann registrëia le recort di partezipanc: 36 scuadres indöt, 27 de ëi y 9 de ëres, che é gnüdes partides sö danter 14 posć, 10 ti Paisc Todësc y 4 te Danimarca, plü avisa danter Schlesia dl Nord y Schlesia dl Süd. Le pröm jüch sará indoman, 29 de jügn, deperpo la finala é preodüda por sabeda, ai 6 de messé.

L’Europeada é n torneo de jüch dal palé che porta adöm tröpes y desvalies comunités de mendranza linguistica y culturala de döta Europa. Le vize Presidënt dla Provinzia da Balsan y assessur provinzial por la Formaziun y la Cultura ladina, Daniel Alfreider, sotrissëia che „l’Europeada é na gran scincunda por les mendranzes. Nosc obietif y nosc impëgn é chël da pité ales mendranzes ocajiuns de incuntada y de confrunt, por slarié fora la comunicaziun, la comprensciun ti confrunc de porsones de n ater lingaz, de n’atra religiun, de n’atra etnia y nazionalité, ciaran da arlontané vigni comportamënt y vigni espresciun da orëi crou, a mët man dal monn dl palé.

I ti aodun a düc y a dötes n bun devertimënt y de de beles esperiënzes tla Schlesia-Holstein, söl termo danter Paisc Todësc y Danimarca, olache bëgn cater mendranzes porta inant so lingaz dla uma y süa cultura da tröpes desënes d’agn, y olache le plurilinguism é conscidré n arichimënt por vigni identité.“

I Ladins y Les Ladines, i Südtiroleri y les Südtiroleres

La scuadra I Ladins rapresentëia la mendranza ladina dl raiun dles Dolomites. Le grup á tut pert por le pröm iade ala Europeada tl 2012.  Deplü söla scuadra I Ladins: europeada.eu/de/teams/I-Ladins

Ince Les Ladines fej para: europeada.eu/de/teams/Les-Ladines

Südtirol é rapresenté da d’atres döes scuadres: dal scomenciamënt dl’Europeada, tl 2008, ne á i südtiroleri lascé fora gnanca na ediziun y é stá i davagnadus de dötes les ediziuns dl Europeada. Deplü söla scuadra di ëi de Südtirol: europeada.eu/de/teams/Suedtirol

Na scuadra de ëres de Südtirol á bele tut pert ales Europedes dl 2016 y dl 2022, y sará ince chësc iade ala pert: europeada.eu/de/teams/Suedtirol-1

An pó ciafé informaziuns generales sura le Campionat Europeich dles mendranzes linguistiches sot a: europeada.eu

Dötes les partides vëgn trasmetüdes tres streaming: www.youtube.com/@Europeada2024