La cultura coche forza che lieia

La Cunsulta culturela provinziela rejona dla prupostes per svilupé diretives strategiches tl lëur culturel te Südtirol

BULSAN (USP). Svilupé y sutenì l lëur culturel te Südtirol: chësc ie la finalità dla Cunsulta culturela provinziela, che ie jita ite plu sot te chësta cuestion pra na senteda ai 9 de juni. Per la elaurazion de linies strategiches n con‘ dl lëur culturel te Südtirol fòvel bele dant unì abinà adum prupostes y ntervënc; śën iesi pra chësta senteda unii metui adum aldò di ciamps tematics. L ie unì rujenà de tematiches coche l ulentariat, la sënta de munitoraje, la cunlaurazion nterculturela, l fair pay. Śën se tratel de lauré ora mesures che se lascia mëter n droa te chësta legislatura.

"Cultura viva tën na sozietà viva", auza ora l assessëur provinziel Daniel Alfreider: "Cultura fej pert essenziela de na cumenanza. Garantì la segurëza di nvestimënc tla cultura ne n'ie nia mé na cuestion de scioldi y de aministrazion. Medemo mpurtanc ie nce pruzedimënc plu asvelc y nia burocratics per sustenì l miec che la va nosta lies. Na mpurtanza zentrela à nce la cunlaurazion cun la istituzions de furmazion, ajache la ie n presupost essenziel per nvië via la generazion jëuna a cunëscer la cultura y la vita de uniun."

"Cultura y furmazion ie mesuns zentrei per la cumenanza, la democrazia y la politica culturela, che possa renfurzé l tenì adum y judé a tò y tres sfëntes soziels", sotrissea l assessëur Philipp Achammer: "I jëuni y la jëunes dëssa unì tachei/des ite deplù ti pruzesc culturei, la va de tò su si ideies y de sustenì si cumpartezipazion ativa. Te tëmps de ndesfideda iel da crì y renfurzé lueges de ancunteda, acioche la persones de background culturel desferënt posse se giamië ora danter ëiles. La cultura possa vester na forza de cunliamënt per renfurzé na sozietà davierta, ntlujiva y solidela. L ie da sustenì cun cuscienza lueges analoghes y ancuntedes persuneles. Na vita culturela liedia, da plu fazetes y zënza rëms muessa vester davierta per duc. La va de renfurzé la scumenciadives cultureles che ie bele y svilupé furmac nueves, sibe tla ziteies che ti raions ntëurora."

"Chësc ie", da coche sotrissea l assessëur provinziel Marco Galateo, "n mumënt scialdi mpurtant, ajache l ie la prima legislatura te chëla che la trëi Cunsultes Cultureles se giamieia n documënt de lëur strategich deberieda." L assessëur Galateo à fat referimënt ala varietà dla cultures te Südtirol y ala mpurtanza dl'ecunomia nce tl'ecunomia criativa, chël setor ecunomich che se basa sun la criatività ndividuela, la cultura, l talënt y la proprietà nteletuela, y che à coche finamira chëla de generé, tres la criazion y la cumerzialisazion de prudoc uriginei, servijes o cuntenuc, n bënsté y stieres de lëur. "L ie la ulentà de duc deberieda de tenì bas l mesun de ti jì permez ala cultura, mantenian sambën aut l livel culturel che l ie bele", sotrissea l assessëur Galateo. L ie nce mpurtant a crì sinergies.