Miëur paiamënt per l servisc dl'oma/dl pere dl di ie segurà

L paiamënt al'ëura per l'oma dl di („Tagesmutter“) vën auzà da 10,20 euro su a 11,60 euro. La tarifes di genitores resta medemes, i custimënc sëuraprò vën sëurantëuc dala Provinzia de Bulsan.

BULSAN (USP). De ndut 235 umans/peresc dl di te Südtirol cëla de passa mile mutons y mutans de na età danter i trëi mënsc nchin che i/les va te scolina. Ëiles/ëi ie nscila deberieda cun la scolines/kitas y la scolines la seves dl'assistënza ala mëndres y ai mëndri te Südtirol. Per l'assessëura per la families Rosmarie Pamer ne n'ie nscila l renfurzamënt de chësc servisc nia mé na pert essenziela dla politica per la families dl Südtirol, che ie purteda da trëi seves: l renfurzamënt per tëmp y ëura dla families, l sustëni finanziel per la families y la cumpatibltà danter familia y lëur. Plucheauter se tràtel nce de fé a na maniera che la umans y i peresc dl di y la families ebe na segurëza de planificazion: "Auzé l paiamënt de basa ie na premissa mpurtanta per mantenì atrativa chësta prufescion tan mputranta y per pudëi ti pité l servisc, sce la va, a duta la families che à debujën. Tl medemo mumënt nes àl sapù mpurtant che per i genitores ne unìssel nia a s'al dé custimënc sëuraprò tres chësta mesura, perchël vën i custimënc sëuraprò seurantëuc defin dala Provinzia," sotrissea l'assessëura Pamer.

Cuncretamënter vëniel tla delibera data pro ai 27 de agost dala Jonta provinziela preudù n mudamënt di criteres per finanzië la cëses di mutons y l servisc per mëter a verda, che unirà fata tres l'Agentura per la Families dla Provinzia. Cun chësc uniràl auzà l paiamënt al mumënt da 10,20 euro su a 11,60 euro. Per la 14ejima vëniel tëut n cunscidrazion n adatamënt dla nflazion dl diesc percënt. L presupost ie chël che la urganisazions che mëina l servisc ti debe l aumënt a duc i cunlauradëures. La regulamentazion vel retroativamënter dai 1. de jené dl 2026. I custimënc sëuraprò ie de 1,7 milions de euro, che vën sëurantëuc dala Provinzia de Bulsan.