![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Opra d’ert coche pest de recunescimënt: "Ert X Merit Ladin" 2026
L Südtiroler Künstlerbund scrij ora cun la Direzion Intendënza y Cultura ladina per l 2. iede l cuncors artistich "Ert X Merit Ladin" per artistes y artisć dla valedes ladines
BULSAN (LPA). L Südtiroler Künstlerbund scrij ora n cooperazion cun la Direzion dl’Intendënza y Cultura ladina per l segondo iede l cuncors artistich Ert X Merit Ladin. L travert dl cuncors ie chël de sëurandé tl cuntest dl Merit Ladin – na uneranza dla Provinzia de Bulsan per l merit straurdiner tl ciamp dla rujeneda y cultura ladina (LPA à comunicà)– n’opra artistica coche pest de recunescimënt.
"Cun l‘uneranza dl Merit Ladin vëniel premià la persunaliteies straurdineres che à cuntribuì cun si lëur ala promozion y al sustëni dl’identità ladina – sibe tres la nrescida, la furmazion o l’ert – y che à nce abù n mpat sëura la cumenanza ladina ora", sotrissea l assessëur provinziel per la scola y cultura ladina Daniel Alfreider.
"Do l suzes y la gran partezipazion dl ann passà dëssa l pest inò vester n bel sëni per l merit", auza ora l diretëur dl’Intendënza y Cultura ladina André Comploi: "L ne dëssa nia mé uneré l mpëni ejempler, ma nce sustenì l lëur artistich y renfurzé l liam culturel. Ie son recunescënt che l Südtiroler Künstlerbund ebe sëurantëut chësta scumenciadiva de valor, tulan ite nce urganisazions d’ert ladines."
"Per nëus iel n gran unëur y tl medem mumënt n arichimënt che artistes y artisć fej pea pra la realisazion dl Merit Ladin", spiega l presidënt dl Südtiroler Künstlerbund Alexander Zoeggeler: "L liam danter esprescion artistica y recunescimënt culturel ti dà ala uneranza mo n majer pëis y mo plu vijibltà."
Deplü informaziuns
Ert X Merit Ladin
L possa fé pea artistes ladines y artisć ladins de prufescion che mostra su n troi artistich y/o na furmazion aldò. L cuncors ie daviert per duta la formes d’ert visuela y ne à degun lims de età.
Chi che ie nteressà possa mandé ite nchin ai 7 de mei 2026 al mascimo trëi prupostes de opres che ie bele – o na nuvità de chësta edizion - prupostes de proiec de lëures mo da realisé. L vën udù de bon uedl opres saurides da tenì tla man, che ie adatedes per unì sëurandates ala persunalità unereda. N cont dl cuntenut ne vëniel scrit dant nia. L’opra dassëssa reprejenté n omaje lunënt, na vijion o n sëni de recunescimënt, simbolisan l valor y la uneranza dl’opra de vita. N liam cun la cultura ladina vën udù de bon uedl.
Na giuria de persones espertes cun la diretëura dl Museum Ladin Katharina Moling, l presidënt de La Vëta Aron Demetz, l presidënt dl‘EPL – Ert por i Ladins Iaco Rigo, l cumëmber dl cunsëi dl Südtiroler Künstlerbund Raimund Gross y l’artista Wilma Kammerer chirerà ora n’opra che unirà sëurandata n ucajion dl Merit Ladin pra l Di dla Cultura Ladina ai 19 de setëmber 2026.
L’opra d’ert crissa ora vën premieda cun n pest de 7000 Euro, finanzieda dal Südtiroler Künstlerbund tres n cuntribut dla Direzion dl’Intendënza y Cultura ladina.
Details dl cuncors y dla modaliteies sota www.kuenstlerbund.org.
red/mac/ss
