Pension cumplementera per artisć

Artistes y artisć che ulëssa se damandé na njonta ala pension tres la man publica, muessa fé dumanda de iscrizion tl Register provinziel dl’artistes y di artisć nchin ai 31 de merz.

Artistes y artisć che ulëssa se damandé na njonta ala pension tres la man publica, muessa avëi paià ite nstësc te n fond per na pension cumplementera bele l ann dant y fé dumanda de iscrizion tl Register provinziel dl’artistes y di artisć nchin ai 31 de merz.

La fundamënta giuridica per pudëi sustënì l’artistes y i artisć te si posizion pensionistica ie unida metuda ala fin dl ann 2020 cun la lege regiunela nr. 4. Ntant à la Repartizions de cultura dla Provinzia autonoma de Bulsan deberieda cun l'Agenzia per l svilup soziel y economich (ASSE) metù n droa la mesures per Südtirol.

L dërt de fé dumanda à artistes y artisć che viv y lëura da almanco doi ani te Südtirol y che à n davani al ann nia sëura 35.000 euro. L’artistes y i artisć che uel giapé na njonta ala pension muessa tl 2023 avëi paià ite 500 euro te n fond per na pension cumplementera. La man publica njonta l ann do 500 euro.

Iscrizion tl Register provinziel nchin ai 31 de merz

Na cundizion per pudëi fé dumanda de paiamënt de na pension cumplementera ie la iscrizion tl Register provinziel dl’artistes y di artisć. Chësta iscrizion muessa unì fata nchin ai 31 de merz tl Ufize per la Cultura ladina, tudëscia o taliana. La dumanda de paiamënt de na pension cumplementera ie pona da fé nchin ai 30 de nuvëmber pra l’Agenzia per l Svilup soziel y economich (Aswe). Chësta prozedura ie da tenì ite uni ann.

Tl Register provinziel iel udù dant cin ciamps: ert figurativa y ert reprejentativa, mujiga, leteratura y film. "L’artistes y i artisć che uel uni ann se nuzé de chësta forma de previdënza n cont dla pension y che à paià ite te n fond per na pension cumplementera, muessa uni ann fé dumanda de iscrizion tl Register provinziel”, auza ora Sylvia Hofer dl Ufize cultura tudëscia, "l’autra artistes y i autri artisć possa se scrì ite uni cater ani tl Register provinziel. Ala iscrizion se lieia per ntant deguna prestazions."