Pension cumplementera per artistes y artisć

Pension cumplementera per artistes y artisć

BULSAN (USP). Chi che lëura te Südtirol dantaldut te forma autonoma tla categuries ert figurativa y ert reprejentativa, mujiga, leteratura y film y che paia ite te n fond per na pension cumplementera giapa n cuntribut dala man publica.

Per giapé n cuntribut vala de bujën de cater recuisic: avëi la residënza te Südtirol da almanco doi ani; avëi paià ite danter 500 euro y 1000 euro per l ann 2025 te n fond per na pension cumplementera che ëiles/ëi possa crì ora (l davani brutto ne daussa nia superé la soma de 40.000 euro); n muessa vester scric ite tl Register provinziel dl’artistes y di artisć (aldò dl articul 2/bis dla lege provinziela 9/2015) y fé la dumanda online per la pension cumplementera nchin ai 30 de nuvëmber nstësc/nstësses o tres n patronat al’Agenzia per l svilup soziel y economich ASSE.

Chi che mët man tl 2026 a paië ite cuntribuc te n fond per na pension cumplementera, possa permò tl 2027 fé dumanda per l paiamënt cumplementer y l possa nchin ai 31 de merz fé dumanda de iscrizion tl Register provinziel dl’artistes y di artisć. Chësta vën fata respetivamënter ti ufizies per la cultura dla grupes linguistiches ladina, tudëscia o taliana.

L suplemënt cunzedù ie unfat tan aut sciche l cuntribut paià ite te n fond per na pension cumplementera (almanco 500 euro y al mascim 1000 euro). Per chësta mesura de sustëni mët la Region Trentin-Südtirol uni ann a despusizion na soma de 500.000 euro.