Pension de njonta per artisć: dumandes nchin ai 30 de nuvëmber

Artistes y artisć che paia ite te n fond pensionistich de njonta y che ie scric ite tl Register provinziel possa se damandé pra l'ASSE nchin ai 30 de nuvëmber na njonta sëuraprò ala pension.

Per pudëi dé n sustëni ala artistes y ai artisć n cont dla pension iel cun la fin dl ann 2020 unì crià cun la lege regiunela nr. 4 na fundamënta giuridica. Ntant à la Repartizions de cultura dla Provinzia autonoma de Bulsan deberieda cun l'Agenzia per l svilup soziel y economich (ASSE) metù n droa la mesures per Südtirol.

Pension de njonta 2023: fé dumanda nchin ai 30 de nuvëmber

Artistes y artisć che à paià ite tl 2022 te n fond pensionistich de njonta che ëiles/ëi se chier ora, possa fé cont de na njonta ala pension de 500 euro tres la man publica. Na cundizion per giapé na njonta ie la iscrizion tl Register provinziel dla artistes y di artisć. La iscrizion messova unì fata nchin ai 31 de mei 2023 pra l Ufize per la Cultura tudëscia, ladina o taliana. La njonta ala pension possa unì damandeda dal'Agenzia per l svilup soziel y economich (ASSE) nchin ai 30 de nuvëmber 2023.

L dërt de fé dumanda à artistes y artisć che lëura ti ciamps dl’ert figurativa, dl’ert dl spetacul, dla mujiga, dla leteratura y dl film, che ie dl Südtirol o che vif y lëura da almanco doi ani tl Südtirol y che à n davani al ann che ne superea nia i 35.000 euro.

Pension de njonta 2024: avëi paià ite tl 2023, iscrizion tl Register provinziel dan la fin de merz

La artistes y i artisć che uel giapé l paiamënt dla pension de njonta tl proscimo ann muessa tl 2023 paië ite 500 euro te n fond de pension de njonta che ëiles y ëi se chier ora y se scrì ite tl Register provinziel dla artistes y di artisć dan i 31 de merz 2024.

La artistes y i artisć che uel uni ann se nuzé de chësta forma de pruvedimënt preventif muessa for inò se tenì a chësta pruzedura, de paië ite 500 euro te n fond de pension l ann dan fé la dumanda per la pension de njonta, de fé dumanda de iscrizion tl Register provinziel y l ann do de fé la dumanda per l paiamënt de njonta al ASSE.

Per chësc pruvedimënt preventif, pensà dantaldut per artistes jëunes y artisć jëuni che lëura per si cont, vëniel uni ann metù a despusizion dala Region na soma de 500.000 euro, scioldi che vën aministrei dala doi Provinzies autonomes de Bulsan y de Trënt.