Pluralità de ujes y perspetives de ëiles ladines

La cultura senieda dal’ëiles ladines al zënter dla manifestazion "Ëiles & Stëiles" per l Di dl’Ëila ai 8 de merz

SËLVA (USP). N ucajion dl Di Nternaziunel dl’Ëila ai 8 de merz ti à l Tublà da Nives dedicà na sëira particulera ala cultura senieda dal’ëiles ladines. Al zënter dla sëira dal titul "Ëiles & Stëiles" fova l’ert, la leteratura, la mujiga y la performance de artistes ladines de generazions defrëntes. L nteres fova ora de mesura grant: duta la lerches fova bele resservedes n valgun dis dan la manifestazion. La gran resonanza à mustrà drët tler l gran nteres per i argumënc dl’ëiles, dla cultura y valivanza tl raion ladin. Tl medem mumënt ti iel unì pietà al’ëiles di ciamps culturei defrënc na paladina per lascé audì si usc y si ponc d’ududa. La jurnalista y diretëura artistica dl Tublà da Nives Martina Rier, che à deberieda cun Sofia Stuflesser y André Comploi dl Departimënt Intendënza y Cultura Ladina njinià ca l program dla manifestazion, à menà tres la sëira.

N mumënt zentrel dl prugram ie stat la mëisa turonda cun ëiles de generazions y ciamps soziei defrënc: Hannelore Insam, cumëmbra dla Consulta per la valivanza dl’oportuniteies, la diretëura dl Istitut Ladin Micurà de Rü Irene Prinoth, la jurnalista dla Rai Ladinia Jasmin Ferdigg y l‘ex-atleta y mpresera Lotte Nogler. Tla descuscion meneda da Marina Rier iel unì rujenà de svilups atuei y ndesfidedes per l’ëiles. Ti ani passei iel unì fat vares mpurtanc, ma l troi per ruvé ala valivanza danter ëi y ëiles ie mo lonch. D’autri argumënc ie la deficultà de lië adum la familia y l lëur, la chances defrëntes de cariera y la maniera de pensé patriarchela.

“Ëiles&Stëiles” ie na scumenciadiva dla Lia culturela Tublà da Nives n cunlaurazion cun l Departimënt Intendënza y Cultura Ladina dla Pruvinzia de Bulsan.