#prömtëmp assessur Alfreider (1/3): Cultura ladina

L assessëur provinziel Daniel Alfreider fej l pont dla situazion: svilupé l'istruzion, la cultura y la junanza ladina cun urientamënt al daunì

SËLVA (USP). Ntan na cunferënza stampa tenida tl Tublá da Nives te Sëlva, à Daniel Alfreider, assessëur provinziel per l'Istruzion, la Furmazion y la Cultura ladina, deberieda cun l team dl assessoart y departimënt fat n bilanz dla prima pert dla legislatura. Tl zënter dl’atenzion fova i traverc arjonc nchina śën, la priuriteies strategiches di ultimi doi ani y mez, coche nce la ndesfidedes prinzipeles y la pruspetives per l daunì.

"Ne ulon sambën nia sotvaluté l fat che nce tl ciamp dla istruzion y dla cultura ladina iesen dan a n valguna ndesfidedes – l tleca pensé al'evoluzion demografica, ai mudamënc soziei y ala digitalisazion. Purempò se stiza nosc sistem educatif, coche nce la cultura ladina, sun fundamëntes scialdi stersces", à sotrissà l assessëur Daniel Alfreider.

Ti ultimi doi ani y mez iel unì tëut dezijions mpurtantes n con' dl personal. Cun André Comploi coche diretëur per la istruzion, la furmazion y la cultura ladina y Heinrich Videsott coche ntendënt y diretëur provinziel dla Scolines y scoles ladines, iel unì tëut su ncëries de direzion nueves importantes. Nce tla scoles y tla scolines à truep diretëures nueves sëurantëut la ncëries. N ultima à Irene Prinoth sëurantëut la direzion dl Istitut Culturel Ladin.

"Duc ëi, deberieda cun mé, ie al servisc dla populazion ladina, a bën di mutons y dla mutans, di jëuni y dla jëunes y dla families, coche nce di atëures dla cultura y dla lies. Metan adum nosta forzes, judons pea ativamënter, di per di, a furmé l daunì educatif y culturel ladin", à dit Alfreider.

Nce l svilup dla ressorses finanzieles dl setor rejona a na maniera tlera. L bilanz destinà al setor dl’istruzion, dla cultura y dla junanza ladina ie ti ultimi ani for inò unì auzà: da 2,4 milions de euro tl 2016 a 2,9 milions de euro al scumenciamënt dla legislatura da śën, nchin a 4,1 milions de euro de ndut tl ann 2026. De chisc ie 2,1 milions de euro destinei ala cultura y ala junanza y 2 milions de euro al ciamp dla istruzion.

I mesuns finanziei metui a despusizion sotrissea la mpurtanza politica che ti vën data ala istruzion y cultura ladina. La scolines y la scoles ladines ie sinonim de na cualità de istruzion auta, de plurilinguism vif, de nravisamënt culturel y de giaurida ala inuvazion. Tl medemo tëmp dà artisć, lies cultureles y truep ulenteres n cuntribut essenziel per mantenì y svilupé inant l'identità ladina, sustenii da mesures miredes y da cuntribuc da pert dla Provinzia.