"RaetiaCulTour" renfurzea la cultura y l turism sëura la sëides ora

Strategia deberieda per l turism culturel per la "Terra Raetica" - Repartizion Educazion y Aministrazion Culturela Ladina trata ite ativamënter tl pruiet

BULSAN - VAL MÜSTAIR (USP). Ntan l prim fin dl'ena de utober ie la Cumenanza de Valeda dla Val Müstair stata duncheda ite defin tla festa tradiziunela dla racoiuda "Festa da la racolta". La festa ne à chëst ann nia mé pità n mesun per viver la tradizion, la ie nce stata na luegia de ancunteda sëura i cunfins ora per la jënt dla „Regiun Engiadina Bassa Val Müstair“ y dla Venuesta. L pont zentrel ie stat la prejentazion publica di papieresc de strategia dl pruiet "RaetiaCulTour" n dumënia ai 4 de utober, tla Ciasa Jaura a Valchava.

"La relazions danter Südtirol y i Grijons ie caraterisedes da n barat reguler y de gran valuta," sotrissea l assessëur Daniel Alfreider: "Nosc doi raions ie cunliei da truepa cosses: la ujinanza geografica, la ravises storiches y cultureles deberieda y nce truepa cuestions y ndesfidedes deberieda. L dialogh sëura i cunfins ora fej nscila unì su la lerch per mpulsc nueves, per se ntënder un cun l auter y per na bona cunlaurazion. Son perchël scialdi cuntënt che pudon festejé deberieda chësc liam strënt y l barat vivù."

Per la Repartizion Educazion y Cultura Ladina dla Provinzia, partner assozià pra l pruiet, ie la festa na manifestazion de ngran mpurtanza. "Cun l pruiet „RaetiaCulTour“ metons su n puent de valor danter nosta cultures," sotrissea Mathias Stuflesser, diretëur dla Repartizion Educazion y Cultura Ladina: "Nosta ravises retoromanes deberieda cun chëla rumancia tla Svizra ie na arpejon che ne ulon nia mé mantenì, ma svilupé y renfurzé ativamënter sëura i cunfins ora, tres la prejënza vivuda y la cunlaurazion strategica."

Sustenida vën chësta scumenciadiva nce dal diretëur de Departimënt Furmazion André Comploi, che vëija ite coche cossa mpurtanta chëla de renfurzé i barac linguistics y culturei sëura i cunfins ora: "Pra la festa de rengraziamënt per la racoiuda iel unì udù te na maniera mpresciunënta coche l vën vivù la rujeneda retoromana y la tradizion dl raion. De tel ancuntedes sëura i cunfins ora fej unì su n plusvalor, nia per ultim ajache les nes dà a duc da ntënder y fej che pudonse duc tuché cun mans nosta identità deberieda."

L liam tler dla grupes desferëntes dla mendranza linguistica se à nce spidlà tl prugram de curnisc mujighel dla festa de rengraziamënt, che ie unì n gran pert metù a jì da artistes y artisć ladins dolomitics: nscila iel stat da audì n sada sëira l duo rap ladin "PandaLa9" de Gherdëina. N dumënia à la ciantarines "DeCater" de Gherdëina y l Ensemble de Mujiga Populera "Conturines Echo" dla Val Badia metù a jì la manifestazion mujighela de salut y ntroduzion y l’atività mujighela sun plaza de marcià.

Nce Gabriella Binkert Becchetti, presidënta dla „Regiun Engiadina Bassa/Val Müstair“, sotrissea l plusvalor dla cu-uperazion: "L pruiet 'Mehr als Nachbarn' ('Deplu che ujins') à si inuem dut ntëur cun rejon. Tres l barat strategich ntenscif di mënsc passei crësc l’Engiadina Bassa, la Val Müstair, la Val Venuesta y la Ladinia Selana mpue' plu adum. Meton nscila na fundamënta sterscia che possa duré tl daunì per na valurisazion culturela y turistica de dut nosc raion."