Tl sëni dla cultura ladina

La Jonta provinziela dà pro n cuntribut per l Istitut Culturel Ladin „Micurá de Rü“ - Premiazion di cuncorsc letereres Scribo y Scribo Junior y giaurida dla mostra „La Berstot de Lenert“ a Urtijëi

BULSAN (USP). L Istitut Ladin „Micurá de Rü“ urganisea y mët a jì scumenciadives per mantenì y svilupé la rujeneda y cultura ladina. Te si senteda di 18 de setëmber à la Jonta provinziela de Bulsan, sun pruposta dl assessëur per la Scola y Cultura Ladina Daniel Alfreider, fat ora de dé n cuntribut sëuraprò de 190.000 euro per l svilup de sistems nfurmatics per la rujeneda ladina, per la digitalisazion, per la urganisazion dla festa de iubileum per i 50 ani dl Istitut y per sëurantò la biblioteca scientifica dl professëur Edward F. Tuttle te si catalogh dla biblioteca. Nscila iel segurà i mesuns finanzieres per l'atività culturela.

N sada ai 19 de setëmber iel tl cheder dl Di dla Cultura Ladina tla Cësa de Cultura de Urtijëi unì premià chiche à venciù pra i cuncorsc letereres Scribo y Scribo Junior de chëst ann. Te uni categuria iel unì dat ora n prim y n segondo pest de 3.000 y 2.000 euro. Na iuria cun a cë l diretëur de scola y autor Ivan Senoner - cun Nadia Chiocchetti, Werner Pescosta, Ingrid Runggaldier y Carlo Suani - à analisà i tesć mandei ite y cris ora chiche à venciù.

Inant iel te chësta manifestazion de n sada passeda ai 19 de setëmber unì giaurì ie la mostra "La Berstot de Lenert – Die Kunstwerkstatt Lenert – La Bottega d’arte Lenert. Rudolf Moroder (1877–1914) & Ludwig Moroder (1879–1953)"), tl self d'espusizion dla Cësa di Cungresc a Urtijëi. La resta davierta nchin ai 1. de nuvëmber. Tl zënter iel la storia dla berstot dla familia Moroder da Lenert y dantaldut i lëures di scultëures Rudolf Moroder da Lenert (1877-1914) y Ludwig Moroder dl Mëune (1879-1953), che ie danter i artisć prinzipiei dla berstot. Tres scultures, dessënies, mudiei, fotografies y documënc vëniel dat l mesun de ti dé na udleda a si troi de furmazion y a si criazion artistica. Tl medemo mumënt iel tla mostra da udëi l svilup dla berstot y i mudamënc che ie stac tl ziplé de Gherdëina ti prim dejeneies dl 20ejim secul.