Trafich sön i jus dles Dolomites: incuntada danter Provinzia y Comuns

Ai 9 de messé él sté n'incuntada sön la gestiun dl trafich sön Frara danter i rapresentanc di Comuns de Corvara y Sëlva y i comëmbri dl grup de laur competënt y la Provinzia.

BALSAN (USP) En jöbia, ai 9 de messé, él sté tl salf dla Junta provinziala tl Palaz Widmann a Balsan, n'incuntada sön la gestiun dl trafich sön Frara danter i rapresentanc di Comuns de Corvara y Sëlva, i comëmbri dl grup de laur di Comuns dles döes valades y dles assoziaziuns turistiches, sciöche ince le presidënt dla Provinzia autonoma de Balsan, Arno Kompatscher y i dui assessurs competënc Daniel Alfreider (Mobilité) y Peter Brunner (Sconanza dl ambiënt, dla natöra y dl clima).

Tratan la sentada á le grup de laur presenté n sböz dl conzet por l’istituziun de na Zona cun Trafich Limité Teritoriala (ZTLT) UNESCO sön Frara.

“Por mirit dl sostëgn prezius dl secreter de Stat dl Ministere dles Infrastrotöres y di Trasporc, Tullio Ferrante, sunse stá bugn da porté ite la Zona cun Trafich Limité Teritoriala UNESCO tl Codesc dla Strada. Chësc stromënt nes dá la poscibilité da antergní por gestí le trafich sön i jus dles Dolomites”, á detlaré l’assessur provinzial por la Mobilité Daniel Alfreider. “I messun afronté la ZTLT UNESCO cun gran responsabilité y metoda, ajache ara pësa sön la liberté de movimënt dles porsones. Al vá debojëgn da colié la sconanza dl teritore cun i bojëgns de mobilité dla jënt dl post y di ghesć”, á ajunté Alfreider.

Le presidënt dla Provinzia Arno Kompatscher á sotrissé: “Le grup de laur á lauré fora na basa por l’esperimentaziun de na ZTLT UNESCO. Denanco podëi mëte a jí na fasa esperimentala da d'altonn - che é nosc obietif – romagnel porimpó ciamó da stlarí aspec tecnics, organisatifs y iuridics desvalis”.

I vari suandënc

Le proscimo vare prevëiga la trasformaziun dl conzet preliminar te n proiet detaié da pert di Comuns dles döes valades, che sará spo la fondamënta dl’esperimentaziun preodüda por da d’altonn. Na proietaziun detaiada vëgn aratada indespensabla, ajache al foss le pröm iade che al vëgn apliché tla Talia chësc stromënt nü dla ZTLT UNESCO porté ite cun l'ultima reforma dl Codesc dla Strada.

Do tröc mëisc de gran laur dl grup de laur él gnü fora che l’ipotesa de n’esperimentaziun dla ZTLT UNESCO sön Frara ciafa bel plan forma por mirit dl gran laur de scuadra y dl sostëgn dla Provinzia.

L’obietif che düc partësc é chël da ciafé soluziuns efiziëntes por la sconanza dla jënt dl post y por na gestiun sostignibla dla mobilité tl raiun di jus dles Dolomites.

Le test por gherdëna é da ciafé chiló.