Trafich sun jëufs dla Dolomites: ancunteda danter Provinzia y Chemuns

Ancunteda n con' dl manejamënt dl trafich sun l y de viers dl Jëuf de Frea danter reprejentanc di Chemuns de Corvara y de Sëlva, cumëmbri dla grupa de lëur cumpetënta y dla Provinzia.

BULSAN (USP). N juebia ai 9 de lugio iel tla sala dla Jonta provinziela tl Palaz Widmann a Bulsan stat na ancunteda n con' dl manejamënt dl trafich sun Jëuf de Frea danter i reprejentanc di Chemuns de Corvara y Sëlva de Gherdëina, i cumëmbri dla grupa de lëur metuda adum dai Chemuns dla doi valedes y dala assoziazions turistiches y dal presidënt dla Jonta provinziela de Bulsan Arno Kompatscher, deberieda cun i doi assessëures cumpetënc Daniel Alfreider (mubltà) y Peter Brunner (scunanza dl ambient, dla natura y dl tlima). Ntan la senteda à la grupa de lëur prejentà na pruposta de cunzet per la istituzion de n Raion cun Trafich Limità Raiunel RTLR Unesco sun Jëuf de Frea, (per talian ZTLT).

„De gra al sustëni preziëus dl sotsecreter de Stat tl Ministere dla Nfrastrutures y di Trasporc Tullio Ferrante iesun stac boni de mëter ite l raion cun trafich strënt UNESCO tl Codesc dla Streda. Chësc mesun reprejënta na puscibltà de ntervënt per manejé i flusc de trafich sun i jëufs dla Dolomites,“ à detlarà l assessëur provinziel per la mubltà Daniel Alfreider. Tl medemo mumënt muessun ti jì permez al RTLR UNESCO cun gran respunsabltà y manejamënt metodich, ajache l à da n fé cun la lidëza de muvimënt dla persones. N muessa mëter adum la scunanza dl raion cun i bujëns de mubltà de chëi da tlo y ghesć,“ à njuntà Alfreider.

L presidënt dla Provinzia Arno Kompatscher à sotrissà: „La grupa de lëur à laurà ora na fundamënta cunzetuela per la sperimentazion de na RTLR UNESCO. L resta danz mpo mo plu aspec tecnics, urganisatifs y iuridics da studië plu avisa dan pudëi nvië via la fasa sperimentela d'autonn, che resta nosta finamira deberieda.“

 I proscimi vares

I proscimi vares prevëija la trasfurmazion dl cunzet preliminer te n pruiet cun duc i details da pert di Chemuns dla doi valedes, che sarà la fundamënta dla sperimentazion penseda per l autonn. Na pruietazion ala menuda vën rateda de gran bujën, ajache l se tratëssa dl prim iede che l vën metù n droa tla Talia chësc strumënt nuef dla RTLR UNESCO nvià via cun l'ultima reforma dl Codesc dla Streda.

Dala grupa de lëur iel unit ora che do truep mënsc de lëur scialdi grant giapa l'ipotesa de na sperimentazion dla RTLR UNESCO sun l Jëuf de Frea for plu y plu forma, de gra al lëur mpurtant de scuadra y al sustëni dla Provinzia.

La finamira deberieda ie chëla de abiné soluzions che vede bën per la scunanza di abitanc y per n manejamënt sustenibl dla mubltà tl raion di jëufs dla Dolomites.

Tlo iel danman l test per badiot.