![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Vizepresidënt Alfreider vijitea l Presidënt di ministri Oliver Paasch
La minuranzes linguistiches fova tl zënter dl'ancunteda cun l Presidënt di ministri dla Cumunità de rujeneda tudëscia dl Belgio - Alfreider: "scola y istruzion ie prioriteies"
EUPEN (USP). Sun l nvit dl Presidënt di ministri dla Cumunità de rujeneda tudëscia dl Belgio, Oliver Paasch, à l Vizepresidënt dla Provinzia de Bulsan Daniel Alfreider, adum cun na delegazion dla "Föderalische Union Europäischer Nationalitäten" (FUEN), vijità la zità de Eupen. L ubietif de chësta vijita fova de se baraté ora sun la cuestions atueles dla mendranzes, proiec de istruzion y la cooperazion europeica. Deberieda cun Alfreider, à nce Eva Penzes, diretëura dla FUEN, y Myriam Hillout, coordinadëura dla grupa de lëur sun l'istruzion tla FUEN, tëut pert al'ancunteda. Da pert dla cumunità linguistica tudëscia fova danter l'auter leprò Liesa Scholzen, Vizepresidënta dl Parlamënt, i deputac Kathy Elsen, Ewald Gangolf, Freddy Cremer y d'autri reprejentanc politics.
Tl zënter dl'ancunteda fova tematiches sciche l svilup dl Minority SafePack, la ndesfidedes gaujedes dal geoblocking tla regions de cunfin y cuestions de politica d'istruzion y de rujeneda. Nce na vijita te na scola fova sun l prugram.
"L'ancunteda cun l Presidënt di ministri Paasch fova per nëus scialdi mpurtanta. Ie é nce pudù purté i saluc dal Presidënt dla Provinzia Arno Kompatscher. La Regions dl’Europa che à la medema cundizions y ndesfidedes, per ejëmpl tl ciamp di dërc dla mendranzes, tl'istruzion y tla pluralità de rujenedes, muessa cunlauré deplù. Dantaldut la tematica dl geoblocking ie per la regions de cunfin scialdi atuela. L Presidënt di ministri Paasch y si Guviern ie de bon ejëmpli per nëus", auza ora l Vizepresidënt dla Provinzia Daniel Alfreider do l'ancunteda.
Ël rengrazieia per l'ospitalità y per l dialogh daviert y costrutif sotrissan: "La tematiches de scola y istruzion fej pert de nosta prioriteies, avisa sciche l barat sëura i cunfins ora sun i proiec europeics. Ulon resté n cuntat ti proscimi mënsc, dantaldut cie che reverda la tematica dl nseniamënt tla rujeneda dl'oma, per purté inant deberieda proiec cuncrec."
L'ancunteda fova n gran var inant per la cunlaurazion danter l Sudtirol, la FUEN y la cumunità de rujeneda tudëscia dl Belgio.
gm/red
Documënc da desćiarié
- Da man ciancia, l cunsulënt per la urganisazions nternaziuneles, afares europeics y relazions esternes dl Presidënt di ministri dla Cumunità tudëscia dl Belgio Leon Falkenberg, la parlamentera dla Cumunità tudëscia Kathy Elsen, la coordinadëura dla grupa de lëur sun l'istruzion tla FUEN Myriam Hilout, la diretëura dla FUEN Éva Adél Pénzes, l Presidënt di ministri dla Cumunità de rujeneda tudëscia Oliver Paasc, l Vizeprësident dla Provinzia de Bulsan y dla FUEN Daniel Alfreider, la parlamentera dla Cumunità de rujeneda tudëscia Liesa Scholzen, l scienziat politich y referënt politich dl Guviern dla Cumunità tudëscia dl Belgio Grégory Dalbert, l parlamenter dla Cumunità de rujeneda tudëscia Freddy Cremer. (Foto: USP/Departimënt Istruzion, Furmazion y Cultura ladina) » [IMG 321 kB]
- L Vizepresidënt dla Provinzia de Bulsan Daniel Alfreider (a man drëta), deberieda cun l Presidënt di ministri dla Cumunità de rujeneda tudëscia dl Belgio, Oliver Paasch. (Foto: USP/Departimënt Istruzion, Furmazion y Cultura ladina) » [IMG 256 kB]
