Crusc nueva sun piza de Scilier vën da n studënt dl Lizeum Cademia

Hannes Wörz, studënt dl Lizeum d’Ert Cademia a Urtijëi tla sezion design à dessënià la crëusc per l pont plu aut dl Scilier

URTIJËI (USP). Sun l Pez, l pont plu aut dl Scilier iel unì metù su na crëusc nueva proieteda da Hannes Wörz, studënt dl Lizeum d'Ert Cademia de Urtijëi, sota direzion dla prufessëura Christa Kasslatter.

L proiet ie nasciù dal liam danter criatività, design y n cunliamënt sot cun la montes. Tla pert urizontela dla crëusc ie prejenteda la silhoueta carateristica dl Scilier: n elemënt da desferenzië, che dëssa fé cunëscer la piza a prima udleda. Ntan la proietazion iel unì dat pëis te maniera particulera ala stabltà dla costruzion. Do avëi fat n model, à l proietëur metù n elemënt a forma de X tla luegia de cunliamënt dla trasses, auzan nsci la stabltà dla crëusc.

“L ie stata na sensazion straurdenera canche i à cris ora mi proiet. Śën che la crëusc ie sun l Scilier, sons da stramp cuntënt de avëi contribuì a crië na pert dla cuntreda de marueia dl Südtirol y de si simboi”, conta Wörz.

La ncëria per la crëusc ie unida data dai respunsabli dl Schlernhaus, Silvia y Harald Gasser, y la ie unida realiseda dala mpreja de costruzion de mitel Auluma de Lukas Auer cun l Lizeum d'Ert Cademia de Urtijëi/Gherdëina.

N proiet che lieia talënc jëuni, furmazion artistica, artejanat y tradizion alpina, trasfurman na idea nasciuda sun i banc de scola te n simbol nuef dla montes dl Südtirol.