Cunsëi provinziel di senioren: l vën cris nteressei/edes

Chiche ulëssa fé pea ativamenter tl Cunsëi provinziel nuef dla jënt de tëmp possa se candidé nchin ai 10 de auril pra l Ufize provinziel per senioren y Distret soziel.

Cun la lege provinziela "Unì vedli ativamënter“"(LP nr. 12 dl 2022) iel per l prim iede unì metù su na curnisch leghela per sustenì chësc ciamp; oradechël iel mo laite d’autra mesures che ti va a bën dla jënt de tëmp. Danter l auter iel tlo la previjion de n Cunsëi provinziel di senioren. L prim Cunsëi provinziel di senioren ie unì metù su de juni dl 2023, tla legislatura nueva muessa i cumëmbri y la cumëmbres dl Cunsëi provinziel di senioren a livel provinziel unì numinei da nuef. 

L Ufize provinziel per senioren y Distret soziel ie iusta tl lëur de tò ite y de mëter adum la prupostes per numiné i/la candidac/tes. Dlongia la reprejentanza di Chemuns, di Cunsëies soziei, di Cunsëies di senioren, di Servijes per la jënt de tëmp, di Sindacac, di Sindacac di/dla pensiunei/edes, dl Terzo Setor, dl’Ecunomia y dl’Aucatura per la jënt de tëmp dëssa tlo laite nce n/na reprejentant/a dla generazion plu vedla a livel provinziel se cruzië y se mpenië per si cuestions. "Cun chësc/chësta reprejentant/a dëssel unì a s’l dé n liam curelatif cun la cumenanza zevila. Ajache per nëus iel de gran mpurtanza che l Cunsëi provinziel di senioren sibe slargià ora l plu che la vede, a na moda che duta la generazion plu de tëmp de Südtirol posse se udëi y se raté reprejenteda laite," da coche auza ora l’assessëura provinziela Rosmarie Pamer, che à danter si cumpetënzes nce chëla per la politica per la jënt de tëmp.

Chi possa pa se candidé per l Cunsëi provinziel di senioren?

Per pudëi fé pea ativamënter tl Cunsëi provinziel di senioren muessa la/i candidates/c avëi almanco 60 ani y avëi da almanco cin‘ ani incà la residënza tresora te Südtirol; damandà iel nce che n sebe – almanco a livel passif – la doi rujenedes talian y tudësch. "Chiche à nteres a manejé ativamënter la politica de y per la jënt de tëmp, de rujené pea, dëssa se nunzië nchin ai 10 de auril da nëus te Ufize provinziel cun na descrizion curta de si persona", nscila lascia a l savëi la diretëura de Ufize Brigitte Waldner. L vën perià bel de njunté pra i dac anagrafics generei nce na adres de cuntat y n numer de telefonn. Dumandes per fé pea tl Cunsëi provinziel di senioren possa unì mandedes per posta al Ufize provinziel per senioren y Distret soziel (Palaz provinziel nr. 12, Streda Michael Gamper 1, 39100 Bulsan) o tres e-mail (amt.senioren@provinz.bz.it).